一個又Kam又自負的上司

C 二十幾歲，帶住幾年工作經驗轉工，本來以為今次會有更大發揮空間，點知第一日返到公司，就隱約覺得氣場唔對路。公司冇正式 training，冇清晰 onboarding，亦冇人同佢講清楚個 role 最核心係乜。氣氛好似默認咗一件事——你應該自己會明。

OT加班但無實際野做

C 並唔係冇嘢做。相反，佢日日都有任務落嚟，只不過全部都係零零碎碎嘅事。改文件格式、整理舊資料、更新明明可以自動化嘅Excel、剪史前遺物——報紙，好多瑣事做完都唔知有咩用，好似為了Update而Update。公司下班時間是六點，第一日去到傍晚六點幾，C 覺得手頭上嘅工作暫時完成，於是問主管U可唔可以收工。U 即刻面色一沉，話佢應該仲有好多嘢可以睇，不應該咁快走。不過最後都放人，但順帶叫佢第二日早啲返嚟剪報紙，培養多啲 market sense。

自此，market sense 成為萬能答案。

唔清楚方向？因為未夠 market sense。
唔明白優先次序？因為未夠 market sense。
冇人講清楚期望？可能都係因為你未培養到。

C 開始懷疑，market sense 係咪一種內功心法，要靠剪報紙修煉。其實C唔係冇能力。佢之前做過分析、處理過Projects，知道點樣拆解問題。但喺呢度，佢最常用嘅技能變成改字體同搬資料。每日都好忙，但忙得冇方向。

只要自己唔尷尬 尷尬嘅就係人地😅

主管U唔單止有種令人尷尬嘅自然氣場，仲有一種更特別嘅能力——極度自信。佢會提出一啲聽落氣勢磅礴嘅建議，配合大量Jargon Words，什麼Transfomration、提升市場敏感度、加強宏觀思維、改革流程。但當你細問實際做法，就會發現全部停留喺口號層面。大家坐喺會議室入面點頭，心入面各自調整版本。冇人夠膽指出邏輯問題，因為提出疑問嘅人，通常會被歸類為未夠Level。

C 做咗一星期就辭職。唔係因為一件特別嚴重嘅事，而係察覺到，如果長期跟住個又Kam又自負的上司時，自己是在浪費時間。最微妙嘅係，U 真心覺得自己對下屬好。佢覺得已經俾咗好多自由發揮空間，俾咗好多學習機會。每次有人離開，佢都真心困惑人地點解要走。最消耗人嘅，唔係工作量。係你明明知道可以做得更好，卻被困喺無方向嘅瑣碎入面。

電梯門關上嗰刻，C 突然覺得好輕鬆，同時覺得留低喺呢度嘅人好慘。