【小心！Cut咗信用卡都可以繼續被收「年費和逾期費用」😡】

之前有登記TU個信貸提示，今日收到一個SMS通知，話我突然多咗一個逾期帳戶，亦即係有信用卡遲還款。見到呢個訊息，我即刻覺得好奇怪，因為我本身只有兩張信用卡，而且一直都有準時全額清還，唔應該出現逾期情況。

帶住疑惑，我即刻打開自己Transunion App裏面嘅信貸報告查看。結果一睇之下更加愕然：原來張 PayKxxx 信用卡，竟然顯示有二千幾蚊未清還。問題係呢張卡我早喺大半年前已經取消咗，當時仲有打電話同客服確認過，所有結欠都已經清清楚楚還清。之後亦一直冇再收到任何月結單或者欠款通知。

於是我即刻打去該信用卡公司查詢。等咗好長時間之後，終於有客服接聽，佢查過系統後，俾咗個令人氣憤嘅答案。原來佢哋喺我張已取消嘅信用卡上，收取咗 $1800 年費。由於我冇繳交呢筆費用，所以之後再產生逾期費用同利息，最終變成而家二千幾蚊嘅欠款。我即場質問既然信用卡已經取消，點解仲會收年費？對方冇一個清晰解釋，只係含糊其辭，暗示可能係「系統問題」。可能因為公司係近年先開始發卡，取消該信用卡的第一批人才剛剛出現，所以系統Bug一直冇被發現。

聽到呢度，我越諗越心寒。試想下，如果我冇訂閱信貸提示服務，冇留意到SMS或者Email通知，呢筆所謂「欠款」咪會一路滾利息、加手續費？更嚴重嘅係，我嘅信貸評分會每個月被拖低，完全係無辜受害。當我進一步要求該公司協助，去信貸評級機構更正我嘅還款紀錄時，佢哋又將我「踢皮球」——叫我重新透過WhatsApp聯絡客服，再提交書面申請。而最令人無奈嘅係，WhatsApp客服回覆速度一樣慢得驚人。