阿May係公司半個老臣子，不過佢人緣麻麻，佢太多嘢講。開會或者閒時嗰陣，有佢講冇人講，一個沉悶既topic可以由佢一個人講足十分鐘，講到最後其他人都唔知佢想點。佢成日覺得自己睇得最通透，但又表達唔到重點，擺到佢做leader嗰陣，個team更加亂晒,啲嘢最後全部跌返落其他人手度執手尾。Office入面,你問十個有九個半都頂佢唔順。
話說幾個月前事，現喺某個「公司評價」網頁上面出現幾個Post，呢個Page本身大部分Post都係打工仔匿名吐苦水嘅地方。嗰幾篇帖子講嘅係公司一位「某人士」，由始至終都冇指名道姓，但凡係相關部門嘅同事,一睇就心照不宣。
因為帖子入面講嘅嗰個人，就係阿May。
帖子嘅論點其實唔算尖酸,反而句句講中要害。講嗰位「某人士」點樣自我中心、開會點樣有佢講冇人講、帶team帶到散晒、表達同領導能力都麻麻。呢啲嘢,茶水間飲杯咖啡都會聽到人講,根本就係大家心照嘅共識。換句話講，啲帖子大部分都冇講錯，只係將大家私底下嘅嘢，搬咗上網。
當時我哋以為，呢啲匿名帖，間間公司都有，又是私人恩怨，高層咁多重要野做，睇都未必睇，睇咗都未必理，最多都係一笑置知。外人睇完都唔知你地係邊個，Who Cares，同埋過一日就已經沉底。
點知我哋錯晒。原來高層真係會睇，仲要訓導主任上身，睇得好仔細，在意到一個點。
因為阿May，正正係嗰位上級嘅愛將。
唔知點解，呢位老細多年來特別偏袒阿May，平時佢做錯嘢鬧完都係繼續比佢做，,而家見到網上有人(雖然講嘅好多係事實)批評佢,老細即刻火都嚟。佢召見阿May嘅直屬上司——阿Ken。阿Ken被叫入房嗰陣以為係咩大件事，出嚟之後面青口唇白。
「老細話要妥善處理。」阿Ken喺茶水間細細聲講。
我問點處理法，阿Ken苦笑住數:「第一，要令啲Post喺個Page度消失;第二,要全體同事公開表態，撐返阿May;第三,要追查係邊個寫嘅。」
我哋幾個面面相覷。第一樣根本做唔到，個Page係外面平台，你話消失就消失? 第二樣更加荒謬，啲帖子講嘅明明係事實，而家叫全體人公開撐返阿May、話佢冇問題?呢個唔係表態,係叫人指鹿為馬。至於追查「兇手」，就搞到成個office人人自危，原本有講有笑嘅同事互相猜忌，開口之前都要望吓周圍。
阿Ken夾喺中間最慘，佢上面要佢交數，下面又交唔出，而且佢自己心知肚明，好係發生重案時警察查案一樣，兇手是邊個並不重要，最緊要有人頂罪。
而最後嘅結局,跌晒我哋全部人眼鏡。頂唔順壓力嘅,係阿Ken。
老細認定佢「冇能力處理危機」、「保護唔到自己人」,自此之後處處針對，開會當眾插佢、攞走佢手上嘅project、表現評核畀佢低分等，而且來咗次重組，未知會Ken下，將阿May升職。我哋估可能老細覺得佢「被人網上攻擊都企硬,有抗壓力」又或者,純粹係阿May喊得夠大聲、老細又錫到燶,順水推舟畀個位佢。佢個人嘅缺點,喺呢盤棋入面,竟然冇一樣變成過障礙。
捱咗冇耐，阿Ken自己頂唔住一切的荒謬，遞信走人。
帖子最後有冇消失? 喺阿Ken走咗之後，自己慢慢沉落去，被新帖冚過。而阿May,坐上咗更高嘅位，繼續係咁樣開會、係咁樣帶team。
發表迴響