疫情加 AI，到底改變了幾多人嘅人生？
有一位朋友，疫情前大約 35 歲，喺一間餐飲集團做 Procurement Manager，月薪四萬幾。佢本身又幾勤力，放工後仲會幫人補習，每個月穩定多兩萬蚊收入。
加埋埋單接近六萬幾蚊一個月，唔算大富大貴，但生活絕對過得幾舒服。朋友都覺得佢前途唔錯，再做多幾年，買樓上車或者自在人生應該問題不大。
點知疫情一到，餐飲業成為重災區，公司生意急跌，冇幾耐佢就畀人裁咗。最初佢都唔太擔心，心諗自己做咗咁多年管理層，又有專業經驗，搵返份同類工作應該唔會太難。
結果現實狠狠打咗佢一巴。一個月、半年、一年……面試有，但 Offer 冇。
好彩當時仲有補習收入頂住。雖然失業，但佢每日都照舊朝早出門口，甚至繼續俾家用父母，唔想屋企人擔心，亦唔想承認自己已經失業。
不過，另一個變化其實已經悄悄出現。2022 年之後，Gen AI 開始普及。以前學生唔識做功課會搵補習老師，而家直接開 ChatGPT 問；想學數學、英文、科學，YouTube 一大堆免費教學片仲可能講得更生動。
私人補習唔係冇市場，但需求的確少咗。學生走一個，少一個，新學生又愈來愈難搵。慢慢地，補習收入由兩萬變一萬，再由一萬變幾千。去到後來，唔好話俾家用，連自己生活開支都有問題。
睇住銀行戶口一路縮水，佢開始諗方法「賺快錢」。於是走去炒股。好多人以為失業後時間多咗，可以專心研究投資。但現實通常係，當一個人冇穩定收入，又急住想翻身，投資好容易變成賭博。
想追回損失，就會落更多注。落得越密，通常輸得越快。結果幾年間，多年辛辛苦苦儲落嘅積蓄幾乎輸清光。
之後開始碌信用卡生活。最初係應急，之後變成習慣。用信用卡交生活費，再用另一張信用卡還上一張，到最後欠款愈滾愈大。
身邊朋友其實有勸佢。有人叫佢送外賣，有人叫佢揸 Uber，有人話做住啲短期工頂住先。但佢始終過唔到自己嗰關。
曾經做經理，月入六萬幾，而家走去送外賣？喺佢眼中，問題唔係收入，而係面子。佢甚至覺得朋友係睇佢唔起、玩佢。結果因為放唔低以前個身份，錯過咗好多重新開始嘅機會。
就咁一拖，足足拖咗接近六年。
直到最近，佢終於搵返份 Procurement 嘅 Full Time 工。工作內容同以前其實差唔多，但市場已經完全唔同咗。人工比疫情前少咗差唔多一半，但要求反而高咗好多。
老闆要結果、要效率、要即時回應，OT 更加變成家常便飯。
每日壓力大到唔想返工，但面對幾十萬信用卡債務，佢根本冇資格任性。
因為佢知道，今次如果再失手，可能真係翻唔到身。
有時候，最可怕嘅唔係疫情，亦唔係 AI。
而係世界已經變咗，但你仲用緊舊世界嗰套標準去睇自己，最後困住自己嘅，反而係放唔低嘅自尊心。
發表迴響