租霸就聽得多，「業主霸」你又聽過未？

話說朋友有個單位放租咗好一段時間，終於搵到合適租客，雙方仲約好簽約。點知準備出發去單位簽約前兩個鐘，突然收到代理電話。

原來租客一直未收到現租住單位業主退還的按金。

租客表示，現任業主係內地人，平日已經好難聯絡，之前一直擔心退租時會出問題。經過多番溝通，雙方原本協議好喺今日租約完結時退回兩個月按金。但當日查Online  Banking時，條數一直未到。

租客就打比業主

☎️ 未接

☎️ 未接

☎️ 未接

連續搵咗業主幾個鐘，對方終於肯接電話，點知業主好淡定咁講：「我現在沒錢，就算你搬走，我都退不了按金給你。」

租客：「啥意思意思？」

業主：「字面意思。」

租客：「那按金呢？」

業主：「沒有。」

租客：「什麽叫沒有？幾時會有？」

業主：「不知道。」

租客：「……」

面對呢種情況，要跨境追討既麻煩程度可想而知。就算成功入稟，律師費隨時貴過按金本身，仲未計要花幾多時間同精力。

結果，租客最現實嘅做法就係繼續住多兩個月，用租金抵銷按金損失，無奈放棄租我朋友個單位。代理繼續白做，而最大贏家，係冇錢退按金嗰位業主。

因為舊業主嘅財務問題，而影響到新租約成交，真係比較少見。

所以話，唔單止業主要了解租客背景，其實租客都有需要了解業主背景。畢竟租賃關係從來都係雙向風險，否則你以為自己租緊樓，最後先發現自己一路借緊兩個月免息貸款俾業主。